An Gemini Wind Energy Corp. (GWEC nagpapahayag sini nga pagkaklaro pagbaton san mga pahayag nga may kalabotan sa Calbayog Pan-as Hayiban Protected Landscape (CPHPL). Ginkikilala ngan ginpapasalamatan namon an interes san ngatanan nga mga stakeholders, kaupod an mga miyembro san media, mga environmental advocates, ngan mga molupyo, para masiguro nga an pagtindog san mga renewable energy projects nagpapabilin nga may pag-abuyon sa pag proteher san kalibungan ngan sustenable nga pagdumara.
An amon katuyoanan amo an paghatag sin husto nga impormasyon, ngan pagpatapod nga an proyekto bug-os nga nasunod sa mga balaod, polisiya, ngan siyentipiko nga prinsipyo nga nagmamando sa renewable energy ngan mga protected areas.
- An Republic Act No. 11038, o an Expanded National Integrated Protected Areas System (E-NIPAS) Act of 2018, klaro nga ginikikilala an prinsipyo san multiple-use management sulod san mga protected areas. Gintutugotan sini an mga environmentally sound renewable energy nga mga proyekto sulod san Multiple-Use Zones (MUZ), basta mayda sin hugot nga pagrepaso, magbubuhat sin Environmental Impact Assessment (EIA) nga magreresulta sin paghatag san Environmental Compliance Certificate (ECC), ngan pagtugot tikang sa Protected Area Management Board (PAMB). Sanglit, sayop an interpretasyon sa balaod nga kuno ginbabawal an ngatanan nga buruhaton sa sulod sin protected area.
- An Republic Act No. 9513 o an Renewable Energy Act of 2008, upod an Philippine Energy Plan ngan Ambisyon Natin 2040, nagmamando nga an nasud kinahanglan magbalhin ngadto sin mas malimpyo, mas sigurado nga enerhiya sa maabot nga panahon.
Pag-abot san 2030, gin-uungara san Pilipinas nga makuha an diri maubos sa 35 porsyento san bug-os nga produksyon sin kuryente tikang sa renewable energy sources. Ini nga nasyonal nga polisiya nasusubay san United Nations Sustainable Development Goal 7 (“SDG 7, Barato ngan Malimpyo nga Enerhiya”) ngan napailarom san UN 2030 Agenda pati na an 2015 Paris Agreement, kun diin pareho nga nanawagan sin pagpakusog san paggamit san renewable energy para maibanan an epekto san climate change. An wind energy, bilang renewable ngan sustainable, direkta nga nagsusuporta sini nga mga katuyoanan.
- Kabaliktaran sa nagwawarak nga sayop nga impormasyon, waray wind turbine o parte san proyekto nga nahimumutang sa sulod san Strict Protection Zone (SPZ) san CPHPL. An ngatanan nga proposed installations aada la sa MUZ, subay san zoning nga gin-aprobahan san PAMB ngan ginkumpirma pinaagi san geospatial analysis. Didi sa MUZ gintutugutan an mga buruhaton para sa pagpauswag nga angay o sadang sa mga katuyoanan san pagkonserba. An CPHPL may kabug-usan nga nasasakupan nga 5,067.93 hektarya, kun diin 1,926.94 hektarya sini an MUZ. Tikang sini, an GWEC nag-apply sin SAPA sa 139.27 heektarya, ngan 24 hektarya la sini an gagamiton para san wind project. Ini 0.48% la san kabug-usan nga CPHPL.
- An PAMB usa nga multi-sectoral nga grupo nga ginkokomponer sin mga representante tikang sa lain-lain nga sektor, lokal nga panggobyernohan, nasyonal nga mga ahensya san gobyerno, civil society organizations, ngan pribado nga sektor. An PAMB nagkikiwa pinaagi sin transparent ngan participatory nga proseso, kun diin an mge desisyon kolektibo nga ginhihimo san mga miyembro, diri sa uusa la nga tawo, pinaagi sin mga konsultasyon, technical working group (TWG) review, ngan mga Information, Education and Communication (IEC) activities. An mga resolusyon ngan aksyon naagi sin deliberasyon ngan ginkakaurusahan san board, ngan gin-aaprobahan san DENR Regional Executive Director, nga amo liwat an PAMB Chairperson. Ini nga istruktura nagsusulong sin accountability, inclusivity, ngan shared responsibility sa pagdumara san protected area.
- Sumala san mga siyentipiko nga pag-aram, an wind energy systems diri nagkokonsumo, nagbabag-o, o nagkokontamina sin mga tubig nga mapagkukuhaan. An kadamuon ngan kalidad san tubig sa Calbayog watershed magpapabilin nga diri maapektuhan tungod kay an mga wind turbines nagana nga waray sin pagsunog, pagpagawas sin discharge o effluent. Sa kamatuoran, pinaagi san pagliwan san pag gamit san mga fossil fuel, gin-iibanan sini an greenhouse gas emissions nga nakakaraot san watershed ecosystems.
- An pinaka-labaw nga rason san climate change ngan pagkawara san biodiversity amo an pagsunog san fossil fuels. An mga renewable energy projects sugad san Gemini Wind Power Project importante para mawara an carbon emissions, maibanan an polusyon sa hangin, ngan maprotektaran an mga ecosystems para san masunod pa nga henerasyon. An pagbalhin ngadto sa malimpyo nga enerhiya diri usa nga tarhog sa kalibungan, kundi usa nga moral ngan siyentipiko nga panginahanglan.
Ginpapaabot utro san GWEC an amon pagkamatinumanon para sa sustenable nga pag-uswag samtang ginpapanginano an mga konsiderasyon para sa kalibungan sugad san pagproteher san biodiversity, pagmentenar san ecosystem services, ngan sustenable nga pagdumara san mga natural resources. Padayon kami nga masunod sa ngatanan nga regulasyon san Republika san Pilipinas, ngan andam kami nga magpadayon sin dayalogo ngan pakigtrabaho sa mga stakeholders para makab-ot an kaupayan san ngatanan.
